ethiopia1ETHIOPIAN MUSLIMS PROTEST AGAINST RELIGION INEQUALITY IN ETHIOPIA: WASHINGTON DC

ethiopot-dc-protest1

በዋሽንግተንና አካባቢዋ የሚኖሩ ኢትዮጵያውያን ሙስሊሞች በኢትዮጵያ ውስጥ ያለውን የሀይማኖት ጭቆና በመቃወም ሰላማዊ ሰልፍ አደረጉ። በሰላማዊ ሰልፉ አንድ ሽህ የሚጠጉ ሙስሊሞች የተሳተፉ ሲሆን ሴቶች እህቶችም የሰልፉ ተሳታፊ እንደነበሩ በስፍራው የተገኙ ሚድያዎች ዘግበዋል። በዚሁ በአሜሪካ የኢትዮጵያ ኢምባሲ ፊት ለፊት በተደረገው ሰልፍ ላይ ለፍትህና እኩልነት የቆሙ ክርስቲያን ኢትዮጵያውያን ግለሰቦችም እንደተሳተፉ የአይን እማኞች ጠቁመዋል። ሰልፈኞቹ ከያዟቸው መፈክሮች መካከል፡-

በኢትዮጵያ እየደረሰ የለው የሙስሊሞች ጭቆና ይቁም!

በህገ-መንግስቱ ላይ የተቀመጠው የሀይማኖት እኩልነት በተግባር ይተርጎም!

ነብዩ መሀመድን (ሰ ዓ ወ) በአደባባይ የዘለፈው ግለሰብ ለፍርድ ይቅረብ!

የሙስሊሞችን ቁጥር በግማሽ የቀነሰውን የተዛባ የቆጠራ ውጤት እንቃወማለን፤ መንግስት በአስቸኳይ ስህተቱን እንዲያርም እንጠይቃለን!

የአክሱም ሙስሊሞች መብት ይከበር!

ኢትዮጵያ የሁሉም ኢትዮጵያዊ ሀገር ናት!

ሙስሊም ተማሪዎች እምነታቸውን በነጻነት የመተግበር መብታቸው ይከበር!

ኢስላም የሰላም ሐይማኖት ነው!

እና ሌሎችም መፈክሮችን ይዘው የፍትህ ጥያቄአቸውን አቅርበዋል።

በአጠቃላይ ሰልፈኞቹ በወቅቱ ያለው የኢትዮጵያ ሁኔታ ያሳሰባቸው መሆኑን ገልፀው መንግስት አስቸኳይ እርምጃ እንዲዎስድ ጠይቀዋል። በአሜሪካ የኢትዮጵያ አምባሳደር ሳሙኤል አሰፋ የሰልፈኞቹን ጥያቄ በመቀበል ከሰልፈኞቹ የተወሰኑትን ፊት ለፊት በማነጋገር መንግስት ለጉዳዩ ትኩረት በመስጠት እየሰራ እንደሆነና በቅርቡም አፋጣኝ ምላሽ እንደሚሰጥ አስታውቀዋል። ለጠቅላይ ሚንስትሩ በደብዳቤ የተዘጋጀውንም የሰልፈኞቹን ጥያቄ በመቀበል ለተገቢው አካል እንደሚያቀርቡም ቃል ገብተውላቸዋል።

በሰልፉ ስነ-ስርዓት ላይ የተለያዩ ሚዲያዎች የተገኙ ሲሆን ከነዚህም ውስጥ ራድዮ ቢላል፤ ራድዮ ነጃሽ፤ እንዲሁም ቮይስ ኦፍ አሜሪካ (VOA) ይገኙበታል። በስፍራው የተገኘው የ ቪ ኦ ኤ ጋዜጠኛ ያነጋገራቸው ተሳታፊዎች እንደገለጹት ኢትዮያውያን ሙስሊሞች በታሪካቸው ብዙ ግፍና መከራ ያሳለፉ እንደነበር አስታውሰው አሁን ግን ይህ ጭቆና ማብቃት እንዳለበት አሳስበዋል። አቶ ወንድሙ አሳምነው በአሜሪካ የኢትዮጵያ ኢምባሲ የውጭ ግንኙነት ሃላፊ በበኩላቸው የሰልፉን ሁኔታ አስመልክተው በሰጡት አስተያየት ሰልፈኞቹ ጥያቄአቸውን በሰላማዊ መልኩ ማቅረባቸው ለሌሎች ምሳሌ እንደሚሆን በመግለጽ ለሰልፉ ፍጹም ሰላማዊነት ምስክርነታቸውን ሰጥተዋል። የሰልፈኞቹም ጥያቄ ለሚመለከተው አካል እንደሚቀርብ በድጋሜ አስታውቀዋል።

ለተጨማሪ መረጃ እዚህ ይጫኑ።