ETHIOPOTጎተቦርግስዊድን በአውሮፓ የሚኖሩ ኢትዮጵያውያን ሙስሊሞች ቀድሞ የነበራችውን አደረጃጀት በአዲስ መልኩ እንዳጠናከሩ ተገለጸ። ከአፕሪል 10-12 2009 በተካሄደው NEME (በአውሮፓ የኢትዮጵያውያን ሙስሊሞች ኔትወርክ) አመታዊ ጉባኤ በስዊድን ጎተቦርግ ሲካሄድ የኔትወርኩ አባላት፡ ደጋፊዎች፡ እንዲሁም ጥሪ የተደረገላቸው እንግዶች ከመላው ዓለም እንደተሳተፉበት በስፍራው የተገኙ የመረጃ ምንጮች ዘግበዋል። ጉባኤው የኔትወርኩን የስራ ክንውን ካደመጠና በጥልቀት ከተወያየበት ቡሃላ በቀጣይ ሊሰሩ የሚገባችውን የአጭርና የረጅም ጊዜ እቅዶችን እንዲሁም ኔትዎርኩን በቀጣይ የሚመሩ የአመራር አካላትን ተወያይቶ በሙሉ ድምፅ አፅድቋል።

በጉባኤው ትኩረትን ከሳቡ አበይት ክንውኖች መካከል በዋነኛነት የሚጠቀሰው በተለያዩ የአውሮፓ ከተሞች የነበሩ የኢትዮጵያውያን ሙስሊሞች ጀማዓዎች በኔትዎርኩ ጥላ ስር መሰባሰባችው ሲሆን ይህንኑም በጉባኤው ላይ የተገኙ የጀማዓዎቹ ተወካዮች አረጋግጠዋል። ይህም ኔትዎርኩን አንድ ደረጃ ከፍ በማድረግ የማህበሮች (ጀማዓዎች) ህብረት አድርጎታል። ኔትዎርኩ በስዊድን ህጋዊ ሰውነትን ያገኘና በመላው አውሮፓ የሚንቀሳቀስ ድርጅት መሆኑ የሚታወቅ ነው።

በዚሁ ጉባኤ 240 000 የስዊድን ክሮነር በላይ ገንዘብ ከተሳታፊዎች እንዲሁም በመላው ዓለም ጉባኤውን በፓልቶክ ሲከታተሉ ከነበሩ ኢትዮጵያውያን ሙስሊሞች ለመሰብሰብ መቻሉን በስፍራው የተገኙ ምንጮች ገልፀዋል። በአሜሪካ ዋሽንግተን ዲሲ የሚገኘው የኢትዮጵያውያን ሙስሊሞች ህብረት (ፈርስት ሂጅራ) ለዚሁ ጉባኤ ያለውን ድጋፍ የሚገልጽ የገንዘብና የሞራል ድጋፍ ማድረጉን የጉባኤው አዘጋጆች ጨምረው ገልፀዋል።

የጉባኤው ተሳታፊዎች እንዳስታወቁት ኢስላማዊ ወንድማማችነታችው በምንም የማይቀየርና ፍጹም ለድርድር የማይቀርብ ሀይማኖታዊ ግዴታቸው መሆኑን ገልጸው በእምነታቸው በእስልምና ላይ የሚቃጣ ማንኛውም አይነት ትንኮሳ በእያንዳንዱ ሙስሊም ህልውና ላይ ያነጣጠረ መሆኑን አስገንዝበዋል። ይህንንም ትንኮሳ የሚፈጽሙ በሀገር ውስጥም ሆነ በውጭ የሚገኙ ሀይሎች ከዚህ አድራጎታቸው እንዲታቀቡ አበክረው አስገንዝበዋል።

ኢትዮጵያውያን ሙስሊሞች ዘር፡ ቀለም፡ ቋንቋ፡ ብሄር፡ እንዲሁም ርቀት ሳያግዳቸው ከምንም በላይ አንድነታቸውን ማጠናከርና ከፊታችው የተጋረጡ ችግሮችን በጋራ መፍታት ከመቸውም ጊዜ በላይ አስፈላጊ የሆነበት ጊዜ ላይ መሆናችው ግልጽ ነው ያሉት ተሳታፊዎች ጨምረውም፤ በውስጣቸው ያሉ ልዩነቶች (Diversity) የጥንካሬአቸው ምንጭ እንደሆኑም አስታውቀዋል። በመሆኑም ይህ በጎ ጅምር በየትኛውም አቅጣጫ መጠናከርና መፋጠን ያለበት መሆኑን ሳያስገነዝቡ አላለፉም።

CLICK HERE FOR PDF FORMAT

CLICK HERE FOR THE DETAILED ENGLISH REPORT